news today, स्थानिक स्वराज्य संस्थांच्या निवडणुका महत्वाच्या - उपमुख्यमंत्री एकनाथ शिंदे

हेवेदावे विसरून कमाला लागा उपमुख्यमंत्री शिंदे यांचे पदाधिकारी व कार्यकर्त्यांना सूचना 

छत्रपती संभाजीनगर, ता.09 - आगामी स्थानिक स्वराज्य संस्था निवडणुकांच्या पार्श्वभूमीवर उपमुख्यमंत्री एकनाथ शिंदे यांनी सोमवारी (ता.08) छत्रपती संभाजीनगर येथील स्थानिक शिवसेना पदाधिकारी आणि शिवसैनिकांशी संवाद साधून त्यांना मार्गदर्शन केले. 

स्थानिक स्वराज्य संस्थांच्या निवडणुका या आपल्यासाठी अत्यंत महत्वाच्या असून आता नेत्यांना जसा विजय मिळाला तसाच विजय कार्यकर्त्यांना मिळायला हवा अशी अपेक्षा याप्रसंगी शिंदे यांनी व्यक्त केली. त्यासाठी शासनाने राबवलेल्या विविध योजना आणि त्यातून मिळालेले लाभ यांची माहिती प्रत्येकाने तळागाळापर्यंत पोहचवावी. आपापसातील छोटे मोठे हेवेदावे विसरून पूर्ण क्षमतेने पक्षासाठी काम करावे असेही त्यांनी यावेळी सांगितले. 

नेत्यांनी देखील कार्यकर्त्यांचा वापर करून न घेता प्रत्येक कार्यकर्ता विजयी होण्यासाठी त्याला बळ द्यायला हवे. महायुती म्हणून आपण सगळे एकत्र आहोत आणि महायुती म्हणून पूर्ण जोमाने निवडणुकीला सामोरे जाण्यासाठी सज्ज राहण्याचे आवाहन समस्त पदाधिकारी व शिवसैनिकांना याप्रसंगी त्यांनी केले. 

यावेळी सामाजिक न्यायमंत्री आणि संभाजीनगरचे पालकमंत्री संजय शिरसाट, आमदार प्रदीप जयस्वाल, आमदार अर्जुन खोतकर, आमदार रमेश बोरणारे, आमदार विलास भुमरे, आमदार अब्दुल सत्तार, आमदार हेमंत पाटील, आमदार बालाजी कल्याणकर, आमदार संतोष बांगर, आमदार बाबुराव कदम कोहळीकर, आमदार हिकमत उढाण, आमदार संजना जाधव,  शिवसेना सचिव भाऊसाहेब चौधरी, शहरप्रमुख राजेंद्र जंजाळ तसेच सर्व शिवसेना स्थानिक पदाधिकारी आणि शिवसैनिक मोठ्या संख्येने उपस्थित होते.