देवगांव शनि येथे सप्ताह सांगता सोहळ्यात घडलेला प्रकार
वैजापूर, ता .08 / प्रतिनिधी- मुख्यमंत्री देवेंद्र फडणवीस यांचे भाषण सुरू असताना एका युवकाने मायबाप सरकार कर्जमुक्ती द्या असे पोस्टर झळकावल्याने काही काळ सुरक्षा यंत्रणा व पोलीस प्रशासन यांची धावपळ उडाली होती. हा प्रकार वैजापूर तालुक्यातील शनी देवगाव येथे घडला.
शनि देवगाव येथे गंगागिरी महाराज यांच्या अखंड हरिनाम सप्ताहाचा गुरुवारी (ता.07) सांगता सोहळा कार्यक्रम होता.
या कार्यक्रमास मुख्यमंत्री देवेंद्र फडणवीस, जलसंपदा मंत्री राधाकृष्ण विखे, आपत्ती व्यवस्थापन मंत्री गिरीश महाजन यांची उपस्थिती होती.
मुख्यमंत्री यांचा दौरा आणि सध्या सुरू असलेल्या शेतकऱ्यांच्या कर्जमाफी मागणी संबंधी आंदोलनांच्या पार्श्वभूमीवर सुरक्षा यंत्रणा अगदी ‘अलर्ट मोड’ वर होत्या.असे असतानाही मुख्यमंत्री फडणवीस यांचे भाषण सुरू असताना ‘माय बाप सरकार गोरगरीब शेतकऱ्यांना कर्जमुक्ती द्या’ अशा आशयाच्या मागणीचे पोस्टर एका तरुण शेतकऱ्याने झळकावले. त्याने कुठल्याही प्रकारची घोषणाबाजी केली नाही. मात्र, सरकारने शेतकऱ्यांच्या कर्जमाफीचे दिलेले आश्वासन पाळावे अशी मागणी त्याने आपल्या त्या कृतीतून व्यक्त करत मुख्यमंत्री फडणवीस यांचे लक्ष आपल्या मागणीकडे वेधण्याचा प्रयत्न केला. अगदी मिनीटभराच्या आत हा सर्व प्रकार घडला.सुरक्षा यंत्रणानी तात्काळ शेतकऱ्याकडे धाव घेत त्याच्या हातून ते पोस्टर ताब्यात घेतले.
दरम्यान सदर घटना घडत असतानाच मुख्यमंत्री देवेंद्र फडणवीस यांनीही आपल्या भाषणात आम्ही शेतकऱ्यांची कर्जमाफी करणारच असल्याचे स्पष्ट केले. दरम्यान मागील वर्षी झालेल्या विधानसभा निवडणुकीत भाजप व महायुतीच्या घटक पक्षांनी शेतकऱ्यांच्या कर्जमाफीचे आश्वासन आपल्या निवडणूक जाहीरनाम्यात दिले आहे.भाजपाचे देवेंद्र फडणवीस, शिवसेनेचे एकनाथ शिंदे व राष्ट्रवादीचे अजित पवार या तीनही नेत्यांनी सत्तेत आल्यानंतर पहिल्याच अधिवेशनात शेतकऱ्यांचा सातबारा कोरा करू,असेही त्यांनी आश्वासित केले होते. परंतु याबाबतचे आश्वासन सरकारकडून पाळले जात नसल्याने गेल्या अनेक दिवसांपासून कर्जमुक्तीसाठी शेतकरी संघटनेसह राज्यातील शेतकरी लोकशाही मार्गाने आंदोलन करत आहेत.
0 Comments