मुंबई - आगामी स्थानिक स्वराज्य संस्थांच्या निवडणुकांसाठी एकीकडे राजकीय पक्ष कामाला लागले असतानाच राज्य निवडणूक आयोगानेही कंबर कसली आहे. त्यासाठीच राज्य निवडणूक आयोगाने राज्यातील सर्व जिल्हाधिकाऱ्यांची येत्या दहा जुलै रोजी व्हिडिओ कॉन्फरसिंगद्वारे बैठक आयोजित केली आहे.
मुंबई शहर व मुंबई उपनगर जिल्हा वगळून राज्यातील इतर सर्व जिल्हयातील निवडणूकपूर्व परिस्थितीचा आढावा या बैठकीत घेतला जाणार आहे. त्याअनुषंगाने जिल्हाधिकाऱ्यांना या बैठकीसाठी काय तयारी करायची आणि काय माहिती घेऊन हजर राहायचे याबाबतही सूचना करण्यात आल्या आहेत.
स्थानिक स्वराज्य संस्थांच्या निवडणुका 2025 हाच या बैठकीचा विषय असून 10 जुलै रोजी बारा वाजता व्हिडिओ कॉन्फरन्सद्वारे ही बैठक होणार आहे. राज्यातील 32 जिल्हा परिषदा आणि 336 पंचायत समित्या तसेच 248 नगरपरिषद, 42 नगरपंचायती व 29 महानगपालिकांच्या सार्वत्रिक निवडणुका आगामी काळात घेण्यात येणार आहेत.या निवडणुकीच्या (महानगरपालिका वगळून) पूर्वतायारीचा विभागनिहाय आढावा राज्य निवडणूक व्हिडिओ कॉन्फरन्सद्वारे घेणार आहे.
या बैठकीमध्ये स्थानिक स्वराज्य संस्था मधील मतदारांची संख्या, मतदान केंद्रे, इलेक्ट्रॉनिक मतदान यंत्रे, आवश्यक मनुष्यबळ या विषयीचा आढावा घेण्यात येणार आहे. या बाबतची माहिती 9 जुलै 2025 रोजी आयोगाकडे सादर करायची आहे.राज्य निवडणूक आयोगाच्यावतीने उपयुक्त राजेंद्र पाटील यांनी याबाबतचे पत्र राज्यातील सर्व विभागीय आयुक्तांना पाठविले आहे.
0 Comments