वैजापूर, ता.08 - येत्या 2 डिसेंबरला होत असलेल्या वैजापूर नगरपरिषद निवडणुकीसाठी शहरात 48 मतदान केंद्रे उभारण्यात येणार असून, या निवडणुकीत एकूण 42 हजार 347 मतदारांचा सहभाग असणार आहे. निवडणूक आयोगाने ठरवून दिलेल्या निर्देशानुसार मतदारांसाठी आवश्यक त्या सोयी सुविधा उपलब्ध करुन देण्यात येणार आहेत. पालिका अधिनियम 1965 नुसार ही निवडणूक प्रक्रिया राबविण्यात येणार अशी माहिती पालिकेचे मुख्याधिकारी तथा सहाय्यक निवडणूक निर्णय अधिकारी बी.यु.बिघोत यांनी दिली.
वैजापूर नगरपालिकेत एकूण मतदार संख्या 42 हजार 347 असून, त्यात.20 हजार 991 पुरुष तर 21 हजार 343 स्त्री मतदार आहेत. यापैकी एससी मतदार 6 हजार 279 असून एसटी मतदारांची संख्या 1 हजार 061 आहे. 2018 मध्ये झालेल्या नगरपालिकेच्या सार्वत्रिक निवडणुकीत शहरात एकूण 38 हजार 787 मतदार संख्या होती. त्यात 3 हजार 560 मतदारांची वाढ झाली आहे. पूर्वी शहरात 11 प्रभाग होते. त्यात एकने वाढ झाली आहे. 12 प्रभागातून 25 नगरसेवक निवडून द्यावयाचे आहेत. 1 ते 11 प्रभागातून प्रत्येकी दोन, तर प्रभाग क्रमांक 12 या प्रभागातून तीन सदस्य असतील. पालिका निवडणुकीसाठी एकूण 300 मनुष्यबळ लागणार असून 10 क्षेत्रीय अधिकारी नियुक्त करण्यात येणार आहेत. तर 20 वाहनांची गरज भासणार आहे. अशी माहिती पालिकेचे मुख्याधिकारी तथा सहाय्यक निवडणूक निर्णय अधिकारी बी.यु.बिघोत यांनी दिली.
प्रभागनिहाय मतदार संख्या पुढीलप्रमाणे...
प्रभाग क्रमांक मतदार संख्या
---------------- -----------------
1 2 हजार 710
2 3 हजार 931
3 3 हजार 693
4 3 हजार 997
5 4 हजार 043
6 3 हजार 121
7 3 हजार 852
8 2 हजार 481
9 2 हजार 762
10 2 हजार 887
11 3 हजार 359
12 5 हजार 496
------------------------------------------------------------
0 Comments