नाशिक, ता.22- नाशिक येथे होणाऱ्या.आगामी सिंहस्थ कुंभमेळ्याच्या पार्श्वभूमीवर ना छगन भुजबळ यांनी गुरुवारी (ता.21) विविध विषयांच्या अनुषंगाने जिल्हा प्रशासनाची बैठक घेऊन आढावा घेतल. सिंहस्थ कुंभमेळ्यासाठी नाशिक-त्र्यंबकेश्वर येथे कोट्यवधी रुपयांच्या निधीतून विविध विकासकामे होणार असून नाशिकच्या विकासाला मोठी चालना मिळणार आहे.
या अनुषंगाने ना.भुजबळ यांनी घेतलेल्या या आढावा बैठकीत जिल्हा प्रशासनाने नियोजन करून ही सर्व कामे गुणवत्तापूर्ण, दर्जेदार व वेळेत पूर्ण करण्याची दक्षता घ्यावी, गोदावरी नदी स्वच्छ व प्रदूषणरहित ठेवण्यासाठी तातडीने उपाययोजना कराव्यात,.भाविकांच्या सुरक्षितसाठी पोलिसांनी अत्याधुनिक तंत्रज्ञानाचा वापर करावा.वाहतूक सुरळीत ठेवण्यासाठी पोलिसांना प्रशिक्षित करावे. महापालिका व पोलिस दलाने वाहतुकीचे नियोजन करावे. नाशिक- त्र्यंबकेश्वर रस्त्याचे रुंदीकरण व इगतपुरीतील समृद्धी महामार्गाच्या इंटरचेंज रस्त्याचे काम पूर्ण करावे. वाहतूक सुरळीत होण्यासाठी यापूर्वी केलेल्या रिंगरोडसह अन्य रस्त्यांचे बळकटीकरण करावे. कुंभमेळ्यासाठी बाहेरुन येणाऱ्या भाविकांना जिल्ह्यातील अन्य अध्यात्मिक व पर्यटनस्थळांना भेटी देता येईल, यादृष्टीने नियोजन करावे. जेणेकरून जिल्ह्यातील पर्यटनाला चालना मिळून रोजगार निर्मिती होईल. भाविकांची संभाव्य संख्या लक्षात घेऊन नाशिक- त्र्यंबकेश्वर येथे नवीन घाटांचा विकास करावा. तसेच यापूर्वी बांधलेल्या घाटांची देखील दुरुस्ती करावी. त्यासाठी सर्व संबंधित विभागांनी समन्वय साधावा अशा सूचना अधिकाऱ्यांना दिल्या.
कुंभमेळा सुरक्षित, स्वच्छ व पर्यावरण पूरक होण्यासाठी नियोजन - विभागीय आयुक्त डॉ. गेडाम
विभागीय आयुक्त तथा कुंभमेळा विकास प्राधिकरणाचे अध्यक्ष डॉ. प्रवीण गेडाम यांनी कुंभमेळा सुरक्षित, स्वच्छ, पर्यावरण पूरक होण्यासाठी नियोजन केले असून त्यासाठी कुंभमेळा प्राधिकरण स्थापन करण्यात आले आहे. तसेच दीर्घ कालावधी लागणारी कामे सुरू करण्याच्या सूचना देण्यात आल्याची माहिती दिली. तसेच महानगरपालिका आयुक्त,पोलिस आयुक्त, सा. बां. विभाग आणि जलसंपदा विभागाचे अधीक्षक अभियंता,पोलिस अधीक्षक यांनी त्यांच्या अधिपत्याखालील विभागांच्या सुरू असलेल्या कामांची माहिती दिली.
यावेळी जिल्हाधिकारी जलज शर्मा, पोलिस आयुक्त संदीप कर्णिक, जि.प. मुख्य कार्यकारी अधिकारी ओमकार पवार, पोलिस अधीक्षक बाळासाहेब पाटील, सा.बां. विभाग अधीक्षक अभियंता अरुंधती शर्मा, जलसंपदा विभागाचे अधीक्षक अभियंता राजेश गोवर्धने यांच्यासह विविध विभागांचे अधिकारी उपस्थित होते. तर महापालिका आयुक्त मनीषा खत्री, कुंभमेळा आयुक्त तथा प्राधिकरण सदस्य सचिव करिश्मा नायर दूरदृश्य संवाद प्रणालीच्या माध्यमातून सहभागी झाल्या होत्या.
0 Comments