वैजापूर, ता.24 - तालुक्यातील नांदूरढोक येथील घटनाभरधाव हायवाने दुचाकीला दिलेल्या धडकेत एकाचा मृत्यू तर एक जखमी झाल्याची घटना तालुक्यातील नांदूरढोक शिवारात घडली. जालिंदर एकनाथ गायधने (वय 41 वर्षे, राहणार नांदूरढोक) असे घटनेतील मयत व्यक्तीचे नाव आहे तर अपघातात योगेश भाऊसाहेब बाजारे राहणार नांदूर ढोक हे जखमी झाले आहे.
याबाबत अधिक माहिती अशी की, जालिंदर व योगेश हे दोघे दुचाकीने शेतातून घरी जात असताना नांदूर ढोक शिवारात भरधाव हायवाने त्यांच्या दुचाकीला धडक दिली. या अपघातात दोघेही दुचाकीवरून खाली पडले तर जालिंदर हा हायवाच्या मागील चाकाखाली सापडला. घटनास्थळी उपस्थित असलेल्या लोकांनी दोघांना वैजापूर येथील उपजिल्हा रुग्णालयात दाखल केले. वैद्यकीय अधिकारी यांनी तपासून जालिंदर यास मृत घोषित केले. अपघातानंतर अज्ञातांनी हायवा पेटून दिला. अपघाताची माहिती मिळताच वीरगाव पोलिसांनी घटनाथळी धाव घेतली. अग्निशामक दलाला पाचारण करण्यात आले अग्निशामक दलाचे वाहन पोहचेपर्यंत वाहनाचे मोठे नुकसान झाले होते. दरम्यान अग्निशामक दलाने आग आटोक्यात आणली.
या प्रकरणात वीरगाव पोलिसांत घटनेची नोंद करण्यात आली आहे. मृत जालिंदर हा मोलमजुरी करायचा व कुटुंबाचा उदरनिर्वाह करायचा. त्याच्या पश्चात पत्नी, मुलगा, मुलगी व आई वडील असा परिवार आहे. तो घरात एकमेव कमवता व्यक्ती होता. या घटनेने परिसरात हळहळ व्यक्त केली जात आहे.या
गंगथडी भागात हायवाचा हैदोस...प्रशासनाचे अर्थपूर्ण दुर्लक्ष
गंगथडी भागात हायवातून मुरूम, वाळू, माती कुठलीही रॉयलिटी न भरता सर्रास चोरटी वाहतूक सुरू आहे. हायवा चालक ओव्हरलोड वाहने भरधाव वेगाने चालवतात. याकडे प्रशासनाकडून अर्थपूर्ण दुर्लक्ष केले जात असून अर्थपूर्ण दुर्लक्षामुळे हायवा चालकांचा गंगथडी भागात हैदोस सुरू आहे.
लाडगावच्या घटनेची पुनरावृत्ती...नागरिक म्हणता हायवा चालक सुधारणारच नाही
या अगोदरही अशीच घटना लाडगाव येथे घडली होती ज्यामध्ये एका चिमुकल्याचा जीव गेला होता. त्यानंतर पुन्हा घडलेल्या या घटनेने नागरिकांकडून संताप व्यक्त केला जात आहे. अवैधरित्या वाळू व गौण खनिज वाहतूक करणाऱ्या हायवा व इतर वाहनावर कारवाईची मागणी या भागातील ग्रामस्थांनी केली आहे.
0 Comments