वैजापूर तालुक्यातील जांबरगाव जवळील घटना...
वैजापूर, ता. 27/ प्रतिनिधी - भरधाव वेगाने जाणाऱ्या ट्रकने दुसऱ्या ट्रकला पाठीमागून जोराची धडक दिल्याने ट्रकचालक जागीच ठार झाला.तर एक जण जखमी झाला. ही घटना समृद्धी महामार्गावर जांबरगाव शिवारात सोमवारी मध्यरात्री बारा वाजेच्या सुमारास घडली. शेख अन्वर शेख गफ्फार (वय 40 वर्ष) रा. आवार ता. खामगाव असे या घटनेतील मयत चालकाचे नाव आहे. तर चालकाचा भाचा शेख महंमद शेख असरार (वय19 वर्ष रा. शेगाव हा जखमी झाला.
समृद्धी महामार्गावर शेख अन्वर हा ट्रक (एम. एच.28 बी.बी. 8081) मध्ये खामगाव येथून तुर भरून घेऊन मुंबईकडे जात होता. त्यावेळी जांबरगाव शिवारात समोरून येणाऱ्या ट्रक चालकाने आपला ट्रक (एम.एच.आर.जे. 50 जी.ए. 5249) अचानक बाजूला घेतला. त्यामुळे अंदाज न आल्याने अन्वर यांच्या ट्रकने पाठीमागून त्यास धडक दिली.अपघातात चालक शेख अन्वर ठार झाला.तर सोबत गाडीत बसलेला शेख महमद जखमी झाला.अपघातानंतर दुसऱ्या ट्रकचा चालक फरार झाला .
घटनेची माहिती मिळाल्यानंतर सुरक्षा रक्षक रिजवान सय्यद , शिवाजी बेळे, पोलीस उपनिरीक्षक लहासे, शेख, पाटील, अरबाज चौधरी, हवालदार किसन गवळी यांनी घटनास्थळी जाऊन मयत व जखमी यांना रुग्णवाहिकेतून वैजापूर येथील उपजिल्हा रुग्णालयात दाखल केले. उपजिल्हा रुग्णालयात शेख अन्वर यांच्या मृतदेहाचे शवविच्छेदन करण्यात आले.या प्रकरणी शेख महंमद यांनी दिलेल्या फिर्यादीवरून दुसऱ्या चालकाविरूद्ध वैजापूर पोलीस ठाण्यात गुन्हा दाखल करण्यात आला आहे.
0 Comments