news today, अनुदानित खतांची ऑफलाईन पद्धतीने विक्री ; वैजापूर तालुक्यातील तीन कृषी सेवा केंद्रावर कारवाई

छत्रपती संभाजीनगर ता.10 - कृषी विभागाने जिल्हयातील  कृषिसेवा केंद्रांची तपासणी केली असता 26 कृषी सेवा केंद्र चालकांनी अनुदानित खतांची ऑफलाईन पद्धतीने विक्री केल्याचे आढळून आले असून विक्री व साठा यात तफावत दिसून आल्याने त्यांच्यावर कारवाई करण्यात आली आहे अशी माहिती जिल्हा परिषदचे कृषी अधिकारी प्रकाश पाटील यांनी दिली. कारवाई करण्यात आलेल्या 26 कृषी सेवा केंद्रापैकी तीन कृषी सेवा केंद्रे वैजापूर तालुक्यातील आहेत.

कृषी विभागाने केलेल्या कारवाईत वैजापूर तालुक्यातील संतोष कृषी सेवा केंद्र, धोंदलगाव, नाथ कृषी उद्योग, गारज व ओम साई ट्रेडर्स, खंडाळा या तीन कृषी सेवा केंद्राचा समावेश आहे. केंद्र शासनामार्फत करण्यात येणारा खत पुरवठा ई - पॉस प्रणालीवर उपलब्ध असलेल्या खत साठ्याच्या अनुषंगाने करण्यात येतो. ई - पॉस प्रणालीवरून विक्री न केल्याने कृषी सेवा केंद्राच्या ई - पॉस प्रणालीवर जास्त खत साठा तसेच प्रत्यक्ष कृषी सेवा केंद्रावर कमी खत साठा अशी परिस्थिती निर्माण होते.त्याचा परिणाम जिल्ह्याच्या खत पुरवठा मागणीवर होतो. शेतकऱ्यांनी देखील अनुदानित खते खरेदी करताना ऑनलाईन पद्धतीचा अवलंब करावा असे आवाहन जिल्हा परिषदचे कृषी अधिकारी पाटील व  कृषी अधीक्षक प्रकाश देशमुख यांनी केले आहे.