वैजापूर, ता.27/ प्रतिनिधी - वैजापूर शहरातील येवला रस्त्यावर असलेल्या बोथरा पेट्रोल पंपाच्या आवारात ज्वलनशील पदार्थ शिंपडून व त्यावर आग लावून पेट्रोल पंप जाळण्याचा प्रयत्न एका दारुड्या व्यक्तीने केल्याचा धक्कादायक प्रकार सोमवारी (25 ऑगस्ट) रात्री घडला. सुदैवाने तेथील कर्मचाऱ्यांनी प्रसंगावधान राखत तात्काळ ही आग विझवल्याने मोठा अनर्थ टळला. या प्रकरणी पंप मालक नंदलाल सुरजमल बोथरा (रा छत्रपती संभाजीनगर) यांनी दिलेल्या तक्रारीवरून शाहरुख हमीद शेख (रा. खंडोबानगर, वैजापूर) याच्याविरुद्ध भारतीय न्यायसंहितेच्या विविध कलमाखाली गुन्हा नोंदवण्यात आला आहे.
बोथरा यांनी दिलेल्या तक्रारीत म्हटले आहे की, सोमवारी रात्री पेट्रोल पंपावरील एक कर्मचारी अजहर ताहेर शेख यांनी फोन करून कळवले की शाहरुख याने शेजारच्या उस्मान चहाच्या हॉटेलमधून प्लास्टिकच्या बॉटेलमध्ये ज्वलनशील पदार्थ आणून पेट्रोल पंप परिसरात टाकला व खिशातील काडीपेटी काढून तेथे आग लावून पेटवून दिले
न्यायवैद्यक (फॉरेन्सिक) पथकाने मंगळवारी घटनास्थळी भेट देऊन पाहणी केली. दरम्यान यां घटनेनंतर घटनास्थळी मोठा जमाव जमा झाला होता. ही संपूर्ण घटना सीसीटीव्हीच्या कॅमेरात कैद झाली आहे. त्यात या तरुणाने लाल रंगाचा शर्ट घातला असून त्याने एका बाटलीत ज्वलनशील पदार्थ आणून तो पेट्रोल पंपाजवळ शिंपडला व नंतर काडीने आग लावून तेथून पळ काढल्याचे स्पष्ट दिसत आहे. मात्र त्याने हे कृत्य कशामुळे केले याचा अद्याप उलगडा व्होवू शकला नाही. याबाबत कायदेशीर कार्यवाही सुरु असून पोलीस त्या व्यक्तीचा शोध घेत आहेत.
0 Comments